ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានដឹងច្បាស់អំពីតួអង្គនៅក្នុងប្រទេសដែលកំពុងតែទាក់ទងនឹងទណ្ឌិត សម រង្ស៊ី តាមរយៈ Zoom ប៉ុន្តែសម្តេចថា មិនទាន់ដល់ពេលដែលសមល្មមអាចនឹងរំលោយចោលបក្សនយោបាយដែលមានសមាជិកពាក់ព័ន្ធនោះទេ។

ថ្លែងក្នុងសន្និសីទសារព័ត៌មានក្រោយពីចុះឈ្មោះក្នុងបញ្ជីបោះឆ្នោតថ្មី នៅសង្កាត់តាខ្មៅ ក្រុងតាខ្មៅ ខេត្តកណ្ដាល នាព្រឹកថ្ងៃទី២០ ខែតុលា ឆ្នាំ២០២២ សម្តេចតេជោបានថ្លែងថា៖ «យើងនឹងពិនិត្យមើលតទៅទៀត យើងរំលឹកថា មិនអាចធ្វើអ្វីផ្តេសផ្តាសដោយខុសពីច្បាប់នោះទេ បើធ្វើខុសពីច្បាប់ យើងក៏មិនញញើតជាមួយនឹងការប្រើច្បាប់ដើម្បីរំលាយអ្នកចោលដែរ។ ប៉ុន្តែអ្វីក៏ដោយក៏ត្រូវមានភស្តុតាងជាក់លាក់ ទើបយើងធ្វើ»។

នាយករដ្ឋមន្ត្រីបាននិយាយថា សម្តេចមិនចោទលើបក្សណា ឬបក្សណាទេ ដរាបណាមានភស្តុតាងច្បាស់លាស់។ តែយ៉ាងណាសម្តេចបានក្រើនរំលឹកដល់អ្នកទាំងឡាយមិនត្រូវមានទំនាក់ទំនងណាមួយជាមួយទណ្ឌិតក្បត់ជាតិ៣ជំនាន់នោះជាដាច់ខាត។

សម្តេចតេជោ បានបញ្ជាក់ម្តងហើយម្តងទៀតថា សម្តេចមិនលើកលែងទោសឱ្យទណ្ឌិត សម រង្ស៊ី ដែលជាជនក្បត់ជាតិ ៣ជំនាន់ជាដាច់ខាត។ ជាមួយគ្នានេះសម្តេចក៏បានត្រៀមកងកម្លាំងរួចជាស្រេចដើម្បីទប់ស្កាត់ចលនាបះបោរប្រឆាំង និងផ្តួលរលំរាជរដ្ឋាភិបាល ជាពិសេសត្រៀមកងកម្លាំងចាប់លោក សម រង្ស៊ី៕

^{PHOTO: KOK KY}